我要做個新移民

又撞車喇 (今次仲好甘)

2008-11-19T09:30:00.003-08:00

上星期四係我喺度返工一週年嘅日子, 揸緊車返工時. 前面嘅truck因前面交通急停, 咁我又停. 後面架truck停唔切, 猛烈撞我車尾, 再將我推前撞落我前面架truck嘅車尾, 三文治.

我哋架車車內冒少少煙, 又漏engine oil, 我都心知不妙. 當我哋等緊警察到場時, 我和太太都開始感到背痛和心口痛. 我要求警察叫部救護車嚟. 救護人員替我哋初步檢查後表示冇大礙, 但我哋都係去睇醫生. 車禍後三個鐘, 我個背脊同條頸都已經唔郁得, 醫生開啲止痛和鬆弛肌肉嘅藥俾我. 痛咗我三日先可以自由啲活動返.

打電話去保險公司, 後面架truck個司機已經承認晒所有責任, 唔會影響到我個保費, 咁都冇咁傷. 不過要等幾日保險公司驗咗車先知我部車點.

星期一保險公司通知我, 我哋部車報銷喇. 真係好唔捨得, 佢只係差四日就落地一年, 估唔到佢咁後生就去咗. 因為我哋份保險嘅關係, 保險公司會賠償一部09年嘅同款車俾我哋. 當然佢只係賠錢要我哋自己去買啦. 不過宜家都周身骨痛, 又要去買過部車, 總之就黑仔啦.

一週年

2008-11-19T08:51:00.003-08:00

2007年11月10日, 我離開香港. 2008年11月10日, 我又離開香港.

十月尾, 終於放大假, 去了東京和香港旅行. 東京唔係第一次去, 我哋只係逗留喺新宿, 涉谷, 銀座等嘅購物區, 其實係冇乜新意. 不過我自己本身真係幾鍾意東京呢個地方, 所以我係完全唔會感到厭倦嘅. 今次去東京前, 我哋做咗啲功課, 睇晒流行東京呢個節目, 去咗幾間佢介紹過嘅餐廳食嘢, 又用低價買咗Sanrio Puroland嘅入場券, 好抵. 不過今次最大嘅發現, 就係啲日本妹今期好鬼靚. 我知佢哋化晒妝, 但係佢哋著衫都好鬼靚. 星期日去行街都由頭靚到落腳, 真係好掂. :>

喺東京玩咗四日, 我哋就去咗香港喇. 其實去香港, 主要係見吓親戚朋友. 時間不多, 其實有啲人都冇機會見. 時間啱啱好, 我喺香港時Amy生咗個女, 去醫院探佢兩母女, BB好得意. :) 除咗Amy, 其他見嘅朋友都係公司同事. 一定要見佢哋, 因為公司已經流傳咗好耐話要裁員, 而我呢班同事都係喺重災區度做, 都想關心吓佢哋. 可能已經有晒心理準備, 佢哋都叫做好positive. 因為要去公司喺將軍澳嘅新office, 我去咗舊居附近同同事食晏. 舊居隔離個商場與地鐵站內都有些轉變, 感覺很有趣, 可惜唔可以返舊居睇吓. 不過我懷疑我還可以用我的八達通卡入屋苑.

兔肉

2008-09-09T13:55:00.003-07:00

早幾日去西人超市買餸, 居然俾我見到有冰鮮兔肉賣! 我喺香港都未見過有兔肉賣, 仲以為呢D嘢係喺中國大陸先至有, 我真係超級大鄉里. 但係我真係覺得好奇怪, 呢度係好多唐人, 但係居然會喺西人超市賣兔仔肉? 唔通西人其實係食兔肉嘅?

斷背?

2008-09-09T12:10:00.003-07:00

公司有個大學生嚟做暑期工, 呢條友仔斯斯文文, 又幾聽話. 我哋叫佢去做啲好悶嘅工作佢都一一做好. 不過暑期工可以做乜吖, 都係咁上下啦.

上兩個星期條友仔send email俾我哋, 話佢last day喇, 希望大家保持聯絡喺Facebook add大家等等. 咁我哋就喺Facebook add佢啦. 佢accept咗我哋之後, 咦! 點解佢係in a relationship with一個男仔名嘅? 係咪宜家啲後生玩到冇嘢好玩啊? 再睇睇佢啲相, 張張都同一條友一齊嘅? 有幾張仲赤裸上身添喎. 不過如果去沙灘玩, 影相時男仔唔著衫有乜出奇吖? 再睇其他albums, 頂! 有啲佢哋兩個仲摟住一齊, 仲有佢哋兩個去參加嗰啲同性戀巡遊嘅相, 我諗佢哋「堅」架.

我係非常歧視基佬嘅. 上帝咁好創造咗男人同女人, 叫男人同女人喺埋一齊, 點解會變咗男同男架? 可能我識得人少, 識嚟識去都係咸濕仔咸濕女, 我從來都冇識過基佬喎. 雖然佢冇搞我, 但係我真係接受唔到同性戀.

我都唔知講乜好

2008-08-11T20:45:00.002-07:00

有個西人同事個男友(其實係佢前夫, 離咗婚但同事冇乜錢, 前夫叫佢住埋一齊)上星期二車禍過咗身. 另外一個同事send email嚟話一齊send張card同花俾佢. 我估唔到同事都仲返工, 原來佢唔想喺屋企, 怕自己一個人就會諗起前夫. 另外車禍中仲有前夫生嘅小朋友重傷入咗醫院, 真令人難過.

當日D花送咗去同事個office, 我放工去攞車時咁啱喺我公司附近碰上同事. 佢收到D花想親自過來道謝, 可能佢放咗工又唔想返屋企. 我見到佢, 都唔知應該同佢講乜, 莫講話英文, 就算係中文我都唔知應該講乜. 佢咁想去避唔去諗, 唔通我仲問佢咩. 我見佢雙眼少少眼濕濕, 我只可同佢嚟個擁抱. 我聽到佢好深嘅呼吸聲, 可能要控制住自己嘅情緒啩.

希望佢嘅傷痛可以漸漸消除, 可以快D見到平日扮惡死好攪笑嘅佢啦.

撞車

2008-07-25T13:19:00.002-07:00

昨日放工返屋企途中, 70街都幾多車. 在車龍中慢慢移動之際, 交通燈轉紅, 在我隔離線嘅車仲去, 我後面架車個人見人去佢又去,偏偏就冇睇佢前面嘅我冇去, 一嘢就撞我車尾.

大家落車睇吓, 我架車又唔係好傷, 只係個bumper爛咗好少同埋花咗. 個西人say晒sorry. 佢話佢個乘客問緊佢嘢, 佢not paying attention, 見隔離線嘅車行, 佢又行. 揸車真係唔好發夢.

今日報咗保險, 我完全唔駛出錢整條bumper, 因為唔係我錯. 撞我嗰個就陰公喇, 整車公司estimate過咁樣修理要差不多600蚊加幣. 如果保險幫佢俾, 佢又要加保險費. 幸好冇人受傷, 揸車真係要小心.

熱到暈

2008-07-01T16:46:00.002-07:00

夏天好似真係嚟喇. 上個星期朝早返工都仲係得11/12度, 我都仲要著件冷衫返工. 前日下午已經27度, 太陽仲好猛. 喺屋企, 間屋最頂層包括睡房和書房, 即使已經開晒窗, 都熱到好似焗爐咁. 我哋屋企又冇冷氣, 只係得把風扇, 我真係熱到暈喇. 好奇怪, 在最底層車房及客房嘅位置, 就涼到好似開咗冷氣咁, 好正. 最衰我哋間客房乜都冇, 如果唔係夏天搬去客房瞓, 咁就真係好爽喇. 唔係喇, 不如真係買番張床褥夏天瞓客房喇…….

新職責

2008-06-10T20:04:00.007-07:00

只係嚟咗半年, 我做開嘅dept同IT合併. 唉, 兩年前我先幾經辛苦離開咗IT, 估唔到始於都係走唔甩. 幸好今次返IT唔係做technical嘢, 如果你叫我去寫program, 我真係寫條毛俾你喇, 我識鬼咩. 我以前喺IT嗰6年半呃飯食之嘛. 今次嘅職責係IT project management.

上星期我個新manager俾咗第一個project我跟. 我好辛苦睇咗啲user requirement都唔知佢講乜. 幸好咁technical嘅嘢係有個business analyst幫我手嘅. 個BA係一個來自香港嘅女人嚟嘅. 佢一見到我, 見我咁香港人樣, 就馬上用廣東話同我傾個project. 佢唔係講個project咩status, 有咩問題等等. 只係話邊個client點, 呢個client又點. 諸多是非. 又係咁話啲developers幾唔聽話, 成日唔準時俾resource estimation, 祝我好運等等. 第一日見完佢, 對佢個印象非常差. 廢話一大堆, 完全俾唔到料我. 同我個新manager傾開, 佢話佢同呢位K女士傾project, 都cannot understand what she says. 仲叫我spend more time with her. 死啦, 佢係咪諗住我哋兩個都係香港人, 會容易啲溝通呢? 我真係好唔得呢一類八婆型嘅人喎. 但係連我個manager都唔清楚個project啲嘢, 我唯有再搵K女士啦.

第二日搵佢, 佢又嚟"你咁咪趕唔切囉", "client個大佬唔簽, 咁你咪做唔到嘢要等佢覆囉. 你又或者去佢office拜會吓佢問佢係咪有咩問題囉"..... 講到個client千祈唔可以得罪, 個project死梗咁. 又浪費咗我半粒鐘, 我真係唔成熟, 我忍唔住爆咗句: "你除咗喺度兇我之外, 有冇咩advice可以俾到我啊". 佢好似唔係好feel到我嘅惡意, 仲係咁解釋佢之前講嘅廢話. 我頂. 我只係覺得你係一個見到人哋藍眼金毛嘅就騰晒雞嘅廢柴囉. 大家都只係幫公司打工, 有乜好驚嗜, 西人真係大碌啲咩, 戇居.

我自己從頭到尾再睇過晒啲料, 問咗自己team裡面一個senior嘅project manager, 佢好有心機教我應該點做. 我昨日自己約個developer傾. 個developer好好人喎, 同我夾好晒成個project plan, 又同我即刻趕好份resource estimation, 比我俾佢哋嘅deadline仲早咗兩日, 完全冇問題喎. 我send個email俾個client, 佢叫哋clarify個requirement, 佢過一陣即刻有貨交喎. 個BA講乜啊?

同我個manager傾返, 佢同意以後technical嘅問題, 我就搵BA幫手, 喺project management上, 我就可以完全bypass個BA. 真開心, 唔好話我崇洋. 西人做嘢係比較爽快啲, 香港人(以前一部分同事同宜家個BA都係)好鍾意是非, 好多無謂政治, 好鬼官僚, 見人哋高級就先踩低自己先, 正一食屎狗. 以後都唔知仲要浪費幾多時間喺佢哋身上.

正衰人

2008-05-04T21:11:00.006-07:00

上星期喺呢度做咗樣喺香港學番嚟嘅嘢:投訴. 其實我平時最多都係發吓牢騷, 真係忍無可忍我先會正式投訴.

話說我搬入新居後, 發現車房外與隔離屋相連嘅花槽好多煙蒂. 我見到唔係好高興, 一嚟我自己唔食煙, 二嚟唔好睇. 上星期日朝早, 見到隔離屋有幾個大約廿歲開頭嘅香港後生仔女喺度聚集. 佢哋應該係喺度集合然後一齊去街. 兩男一女一人一支死人煙, 樣衰到不得了. 至樣衰嘅就係呢班人渣將佢哋啲煙蒂丟晒落對面屋同我哋個花槽, 然後隔離屋個女仔出埋嚟, 佢哋就開車走咗. 我真係忍無可忍, 我即刻攞相機, 將佢哋啲罪證影低晒, 然後我打封電郵連埋啲相寄俾我哋個property manager, 投訴呢間屋嘅住戶同佢嘅訪客.

第二日, 收到property manager嘅回覆:

bullish

Thanks for letting me know.

I will send the owner and tenant letters about this.

Unfortunately, there is no actual bylaw against littering, but I will let them know that this is not acceptable.

I will also ask council to enact a rule so that we can add a bylaw at the next AGM.

XXXX XXXXXX
Property Manager
XXXXXX MANAGEMENT SERVICES (B.C.) LTD.
Agents for the Owners

我唔知道個property manager有冇真係寄信俾隔離屋, 而我今日又發現無端端有支煙喺花槽外圍. 但係我暫時都唔會再有咩行動喇, 因為我喺呢度個中央賣樓網站, 見到隔離屋放盤賣樓, 昨日open house仲有好多人嚟睇樓添. 我同太太都十分非常八卦地扮去睇樓. 原來隔離屋住咗兩兄妹/姊弟. 相信係其中一個大學畢業回港, 唔駛咁大間屋所以賣樓啦. 好囉, 快啲搬走, 好行夾唔送. 希望將來嘅新住戶係個有公德心嘅好人啦.

我愛我家

2008-04-01T18:48:00.002-07:00

最近個多月好忙, 二月中收樓後, 就搵油油公司油過全屋嘅牆身. 間屋嘅牆身本身係綠色嘅, 上手業主之前釘了無數咁多嘅相同畫在全屋嘅牆上. 我們本來已經唔多鍾意牆身嘅顏色, 因為呢款綠色比較深色, 顯得間屋好暗, 我比較喜歡光猛啲. 再加上牆上大大小小嘅洞, 所以一定要補同埋油過晒所有牆身.

接著我們便忙著去買傢俬, 我們到ikea買了兩個書櫃, 一張床, 餐桌與書枱等基本傢俬. ikea買傢俬係自助形式, 那兩個書櫃真係重到離晒譜. 當我放那十多箱傢俬在購物車後, 架購物車真的很重. 我用手腕推購物車轉彎時, 原來把自己右手的手腕扭傷了. 第二日才感覺到右手手腕好痛, 完全用唔到力, 連扭毛巾都唔得. 咁點算? 連螺絲都扭唔到咁點裝傢俬啊? 我左手冇力架喎! 最後我們買了一個電動螺絲批, 真係方便到極. 上螺絲個位又準又實, 好過自己扭餐死. 有時呢啲錢真係唔慳得.

三月一日早上, 我們從父母家搬到新居. 唔知點解, 今次搬屋冇第一次在香港置業時咁興奮, 我今次係覺得安慰, 可以有自己屋企, 唔駛再暫住喺啊媽間屋嘅客房喇.

整個三月, 我們都在拆箱同執屋. 平日要返工, 所以冇乜時間執. 拆箱好過癮, 從香港裝箱過嚟嘅一些衣服, 電器和其他物件, 已經幾個月冇見了. 見返佢哋, 有好多以前香港屋企嘅回憶, 真係好開心. 最近將儲存在部notebook內嘅舊相片抄去部新電腦, 睇返以前香港屋企啲相, 原來我哋以前間屋咁鬼正, 個海景真係超級無敵, 宜家間屋即使係比以前大, 始終以前間屋個海景都係比較吸引. 我最鍾意個海冇乜船, 風平浪靜咁, 望出去真係好舒服. 仲有一樣正就係非常開揚, 個客廳可以完全唔拉窗簾都得, 私穩度極高. 大霧嘅時候, 仲好似住喺雲裡面, 好有趣.

返番嚟宜家呢間屋, 其實我哋仲有好多傢俱未買, 不過呢啲傢俱係唔急用嘅, 例如一張更大嘅梳化, 放在客房嘅梳化床 (未有床咁就唔可以招呼客人喇, 收唔收到啊?), 同放在車房嘅雜物架等等. 等我搵到錢有充足儲備先買啦.

新年不快樂

2008-02-06T19:12:00.000-08:00

今日真冇癮, 應該係我嚟咗呢度之後第一次有「如果我冇走到就好喇」嘅感覺. 即使我賣樓走咗之後香港樓價升咗咁多我都冇呢個感覺. 過農曆新年我冇得放假真係超冇癮.

記得以前喺度讀大學時都係冇得放假架啦, 不過當時每日返學都只係返幾粒鐘, 有乜所謂吖, 唔想返咪走堂囉. 但係宜家返工唔同啦, 唔想返工, 詐病請假都要計入有薪年假. 請一日病假, 扣一日有薪年假. 你有病唔舒服啊? 咁喺屋企休息吓啦. 呢招真係絕, 如果香港都用呢一招, 肯定班大爺實嘈, 實要搵李卓人, 又遊行又示威都似.....

我之前喺香港做嘅部門, 年三十晚3點可以收工. 我以前IT嘅同事, 1點鐘就可以收工喇, 計埋一個鐘食飯, 咪12點可以走人? 點解我走咗之後個老細咁闊佬架? 佢哋個個仲連放4日假, 好羨慕.

好貴

2008-01-14T22:24:00.000-08:00

呢度有兩樣嘢, 我覺得真係好鬼貴.

第一, 手機通話費.

我在香港時, 用3嘅3G月費計劃, HK$128有1200基本通話分鐘, 900分鐘心連心通話, 再加可以上3G睇新聞等等. 呢度, 貴到我只肯用佢哋嘅電話咭. 加幣$20一張咭, 通話費加幣2毫子一分鐘. 即係一張咭可以講100分鐘. 100分鐘要港幣大約$150, 好似時光倒流到香港初初開始手機普及時, 真係落後得可憐.

第二, 凍飲附加費

去香港式茶餐廳, 叫個午餐如果要凍飲, 居然要加加幣一元. 嘩! 香港好似加兩蚊only! 要凍飲居然要加港幣7.5元? 唔駛客氣喇, 天氣咁凍我又cheap, 我要杯熱奶茶得喇, 就算有人請我我都唔飲. 七個半我喺大家樂可以買到杯奶茶喇. 七個半要我買佢幾粒冰? 佢都癡筋.

Project X - progress report 2

2008-01-07T15:03:00.000-08:00

1月2日, 再去我們心儀嘅房屋睇多次, 點知經紀告訴我們, 已經有兩個買家出了offer了. 家陣係咪玩嘢啊? 間屋明明賣咗成個月都冇人買, 我一話有興趣就有兩個人出offer? 我要求經紀替我們聯絡賣方嘅經紀, 因為我們希望加入爭奪戰. 經紀回電, 說賣方已經接納了其中一個offer了. 乜遊戲咁快玩完架, 真沒趣. 又再落空, 咁唯有再搵過啦.

1月4日, 我又發現一個看似合適嘅新盤. 經紀告訴我們該盤在1月5日會有Open House. 我們星期六到該處睇樓. 嘩, 好多好多人. 那間屋間隔幾好, 業主一個人兩隻貓住, 住咗3年半都keep得好企理, 掂. 我們再聯絡經紀, 我們要快快出offer, 如果唔係又係得個睇字.

該晚我們到經紀辦公室預備offer. 經紀已聯絡過賣方經紀, 原來又有另一個買家會出offer, 呢度買樓係咪唔駛錢嘅呢? 點解間間屋都咁快有人買嘅? 我就話係用家啫, 真係好想知其他人係用家定係無良嘅炒家. 我們出咗個有誠意嘅offer, 要賣方一日內回覆.

昨日下午收到經紀電話, 賣方經紀表示對方嘅offer比我們高少少, 問我們有冇興趣出高啲. 唉, 點解想買間屋住都咁辛苦. 我們將出價提升三千元, 賣方經紀表示現在我們雙方價錢相同, 問我們有冇得再加. 加你條命! 我同經紀講唔加喇, 賣就賣, 唔賣就賣俾另一個啦. 經紀說咁現在要業主決定賣俾邊個. 賣樓業主真威水.

再過一小時, 經紀來電說有好消息, 業主選擇賣給我們, 因為我們的成交日期較有彈性, 佢未搵到地方搬, 所以我哋嘅兩個多月成交期對佢非常吸引. 頂! 我諗即使我們唔加三千蚊, 業主根本都對我們嘅條件有興趣, 如果唔係佢根本唔需要打嚟話我們出價冇人咁高. 佢亦可以再同另一個買家講有條茂利同你出一樣價錢, 你有冇興趣加少少? 老襯, 俾人呃咗三千蚊.

呢個星期有排忙, 搵按揭, 搵人驗樓, 搵律師, 搵保險公司, 全部要1月11日前完成.

Project X - progress report

2007-12-31T22:08:00.000-08:00

我哋呢個揾屋project, 喺今年年尾有好大進展. 首先我哋去咗兩間銀行, 問銀行攞咗mortgage pre-approval. 銀行根據我哋嘅收入, 任何欠債及還款能力, 計算出佢哋可以借幾多錢俾我哋. 我哋再根據佢呢個數目及我哋自己嘅本金去搵屋.

我哋揾咗個經紀, 再自己睇報紙上網揾樓盤. 呢度個地產市場炒到發晒癲, 老實唔怕講, 我哋真係買唔起一間獨立屋. Apartment又係貴, 根本就係唔值! 所以我哋專攻townhouse市場. 前前後後我哋睇咗大概十間townhouse啦, 上個weekend睇中咗一間, 該間townhouse係一對老人家住嘅, 間townhouse keep得好企理好乾淨. 雖然間屋已經住咗3年, 但係真係好似新嘅一樣. 間屋間隔又好, 唔會好似好多我哋睇過嘅townhouse咁, 一係房大就廳細, 唔係就房細廳大. 但係該間townhouse已經有一個offer, 仲已經俾業主accept咗. 除非個買家揾唔到銀行做mortgage又或者佢meet唔到佢個offer內嘅criteria啦, 如果唔係我哋都冇乜機會買到呢間屋喇.

今日再同經紀去睇三間townhouse, 有一間我哋都幾鍾意. 呢間屋係新屋嚟嘅, 個價錢好fit, 間隔又幾好, 唯一要批評嘅, 可能係townhouse附近有個油站, 個心有少少唔舒服. 不過呢個可能係個心理問題. 宜家已經睇完間屋6個幾小時, 我好似都仲係幾鍾意間屋. 究竟呢間屋會唔會係我哋將來嘅居所呢? 其實我宜家真係好緊張. 我成日買嘢都好心急, 唔諗清楚就走去買, 但係買樓係好大嘅投資, 我唔敢亂嚟. 希望過兩日冷靜咗啲我哋可以做個英明嘅決定啦.

開工

2007-12-28T21:11:00.000-08:00

記得今年七月辭職時, 我打過電話去人事部問有冇得refer我過去加拿大公司, 等我有機會繼續做工, 可以唔駛食老本. 我仲記得我係咁講: 「我明白公司係唔會養我一世嘅, 不過....」幸好臨離開前, 俾我揾到宜家呢份工, 總算唔駛食老本. 真係冇諗過, 下個月開始, 連太太都會嚟呢間公司打工. 呢間公司, 真係千祈千祈唔好執笠啊. 下個月開始, 我哋大家都喺downtown返工, 我哋可以一齊返工, 一齊放工. 多一個人坐車, 咁我每日嘅汽油錢同泊車錢都值好多啦, 嘻嘻.

希望呢份工係太太嘅踏腳石, 做一年半載攞到工作經驗, 將來佢可以揾位走, 更上一層樓.

痛

2007-12-07T18:41:00.000-08:00

當我仲喺香港時, 如果我熱氣又或者只係有一晚夜啲上床瞓, 不出廿四小時, 我一定會開始出痱滋. 唔出嘅話, 都會就算唔係食緊嘢或者唔係講緊嘢無端端咬到自己下唇. 有時咬得唔夠狠, 佢就過一陣自動在同一位置再咬一次, 直到見血為止. 過一兩日, 該傷口必定會變成痱滋, 如果本人當時毒素高, 佢好多時都在旁邊生多一粒痱滋, 兩粒痱滋然後漸漸變大, 再合併成為超級痱滋. 如果食嘢時觸動到佢, 真係痛到標眼水. 如果食任何有汁嘅食物, 當啲汁刺激到粒痱滋, 痛到爆粗都試過. 通常一粒痱滋由形成到對我冇晒威脅, 都要差不多十日. 甚麼白兔牌, 西瓜霜, 清熱酷都係冇用嘅, 真係好淒涼.

唔知攪乜鬼, 嚟咗呢度之後, 這個以往非常困擾我嘅問題, 突然間自動解決了. 唔知係咪因為呢度天氣乾燥, 乾到連痱滋都死快啲. 有一次仲乾到出血, 唔知係咪咁將痱滋嘅毒排晒出嚟. 最近所生嘅痱滋, 個size沒有香港嘅咁大, 亦沒有二合一嘅超級痱滋出現. 最重要嘅係, 呢度啲痱滋都只係三至四日就消失了. 痛苦嘅時間少了50%以上. 開心 :)

又完成一單喇

2007-12-04T21:16:00.000-08:00

我都幾鍾意做Project, 仲要係做大Project. 2003年做咗個結婚Project, 好enjoy整個籌備過程, Project都算成功. 2007年嘅Project個scope大好多: 賣樓移民. 呢個Project, 我都籌備咗好耐. 賣樓並唔係簽個名收錢咁簡單. 要取消水電煤, 要清理好多垃圾, 要安排搬屋, 要安排地方暫住. 賣樓再加埋移民, 就要安排埋家居物品, 衣服, 電器等運送去另一個國家. 又要攪埋香港嘅錢銀安排, 離港前要做tax clearance, 唔可以欠香港政府一仙一毫. 要安排將副身家帶去移民, 要同朋友暫別, 要搵工作.

到達目的地, 要向政府報到, 要安排醫療保險, 要買部車代步, 要適應環境氣候轉變, 起初我都因敏感流咗鼻水眼水幾日. 又要克服jetlag, 因為好快就要返工.

這兩天, 我們的Project差不多到尾聲. 我們在香港移民裝箱嘅46件物品已經水路到達, 昨天我到海關作清關程序, 因為我們已經離開了超過5年, 所以我們即使擁有少過6個月的物品都不用繳稅. 今日下午, 46件物品運送到我們這個暫時嘅居所. 見到佢地安然無恙, 一個都冇少到, 我都鬆一口氣. 整個Project, 都真係算告一段落了.

我講過, 我鍾意做Project, 我下一個大Project, 就係........要搵地方同太太搬出去住. 始終已經慣了得我哋兩個住, 現在與父母妹妹, 兩隻狗同一隻貓住真係有點唔習慣唔方便. 不過呢度啲樓好鬼貴, 相信2008年呢個大Project, 都幾高難度, 都幾有挑戰性. 不過, 我好期待去享受從籌備到implement嘅過程.

落雪喇

2007-12-01T23:03:00.000-08:00

好開心啊, 終於都落雪喇. 我都唔知點解咁大鄉里, 好似第一次見到落雪咁, 白癡仔.

其實我呢一兩日都不停睇實天氣報告, 知道今明兩日開始會有飄雪. 哈, 今朝一起身望出窗外真係有飄雪. 我們出街食Lunch, 離開餐廳時見到啲雪越落越大, 我們回家時, 我們所住嘅內街地上已經佈滿雪喇. 太太話都係唔好再出街喇. 咁我就成個下午在家執嘢.

到六點幾, 雪好似細咗, 我見妹妹駕車出外都冇問題, 便向太太提議出街食飯. 反正都已經決定住在這裡, 每年都會落雪, 無理由逢落雪都唔出街吖嘛. 在餐廳時見到出面啲雪又越落越大, 出到停車場, 我們部車又佈滿雪, 正當我在清理積雪時, 有個鬼佬走埋嚟, 同我講佢唔係壞人, 佢攞住個百貨公司袋話自己係嚟shopping, 不過佢唔見咗銀包, 佢住喺Burnaby, 佢只係想返屋企. 哈, 佢真係傻得可憐. 又會咁啱有錢shopping冇錢返屋企? 又會咁啱shopping完先唔見咗銀包? 不過佢唔知我係全世界最冇同情心嘅衰人, 我真係幫你唔到喇. 佢一路走開一路講fcuk &^%$@. fcuk乜春夏秋冬吖, 我喺香港嚟架, 香港D祈福黨已經攪到我唔會隨便信人架喇, 係咁先啦.

駕車回家途中, 見到有啲後輪推動嘅車跣胎又起唔到步. 我都驚如果我新車落地只係2星期就俾人撞就超唔抵喇, 所以我都刻意行慢啲離開車群, 小心啲好.

我真係好鍾意今次落雪, 我部車車頭啲水結咗冰, 部車好似流緊鼻涕咁, 好似電視以前影住禽流感啲雞緊鼻涕. :)

Update

2007-11-24T21:33:00.001-08:00

嚟咗呢度兩星期, 自己都差不多適應晒, 因為同喺香港時一樣, 都係星期一至五返工放工. So far so good.

以前: 7:20am起身, 7:50am出門口返工, 8:30am開工
宜家: 6:30am起身, 7:20am出門口返工, 8:30am開工

以前: 返工坐地鐵, 睇AM730報紙
宜家: 返工自己揸車, 睇住前面條車龍

以前: Lunch去茶餐廳同飲茶
宜家: Lunch食Burger King, A&W, food court :(

以前: 6pm收工
宜家: 5pm收工 :)

以前: 放工逼地鐵, 睇住啲OL :)
宜家: 放工揸車, 睇住前面條車龍

以前: 食完飯洗碗, 上網, 睇晚間新聞後瞓覺
宜家: 食完飯洗碗, 上網, 11點瞓覺

差別都唔係好大, 其實我最開心同最欣賞就係呢度啲人真係好似有禮貌同有教養啲. 好似出入門口, 以前前面個人可能只係開少少門, 自己過咗就算. 又或者係只係得少少門隙, 前面個人一嘢就攝入去. 我覺得真係好核突, 好鬼乞兒. 宜家呢度好多人推開門自己出咗去之後, 會望吓後面有冇人. 如果有, 即使我離開好遠, 佢哋都會企喺度幫我頂住隻門, 等我過到嚟為止. 見到咁多人都咁好, 我梗係學啦. 個個都係咁, 我真係會生活得開心好多架.

啊媽, 我應該得咗喇

2007-10-31T01:48:00.001-07:00

昨日收到加拿大公司通知, 佢哋interview我之後對我仍然有興趣, 但係因為一些recruitment policy change, 所以個process慢了. 佢會盡量今日在我離開公司之前俾個offer我.

今日本來係我嘅last day, 但係到朝早10點幾先收到confirmation佢哋已經攞到approval請我. 我真係好開心, 終於都confirm到喇, 我哋可以有收入, 唔駛食老本喇.

海外公司要求我11月13日報到, 我現任老闆Kitty對我真係好, 幫我fight到我宜家喺香港公司嘅last day改為11月12日. 我在11月12日攞annual leave, 咁我就可以11月10日飛到當地, 仲有幾日休息, 11月13日開工. 這樣我亦沒有離開過公司, 繼續係公司嘅人, 咁就可以保留8年年資, 如果出年有得出bonus, 我都有得分. 年資高D, benefit都多D, 有人告訴我咁樣我在當地可以每年多5日有薪假. 我覺得我真係好似中在大獎. 感恩, 感恩.

有得亦有少少失, 我明天就要繼續準時返工喇. 本來諗住放兩個星期大假先過去做新移民, 宜家冇得放假, 冇得去機場影飛機相, 冇得去海洋公園睇熊貓喇. 不過可以保持有收入, 可以有份安心, 絕對係值得. 希望一兩天內可以落實一切事宜啦.

感恩

2007-10-29T00:10:00.000-07:00

我搬離我咁大個仔第一間屬於自己嘅屋了. 昨天在差不多空嘅屋內等新業主上嚟驗樓, 望吓屋內每一個角落, 真係有D唔捨得. 在這間屋內我們經歷過喜怒哀樂, 當然喜樂係佔最大部份. 望出去窗外嘅景色, 真係令人非常舒服. 呢間屋嘅質素同景觀, 再對比起單位嘅成交價, 絕對係十分超值. 我真係好感謝神可以賜呢間屋俾我同太太, 讓我們可以喺咁正嘅環境生活咗三年. 我一個人喺屋內作咗個感恩禱告. 我覺得呢個禱告可以話係我最最最最最最最最最發自內心嘅禱告, 我真係講唔出我有幾咁感恩, 但我知道神會明白我嘅意思.

神真係好愛我哋, 我知道佢必定會看顧我哋. 我已經將我哋將來做新移民後嘅居住, 就業同適應等問題完全交俾神. 我上兩個星期interview嘅工, 到宜家都未有消息. 問個HR manager佢又唔知, interview我嘅manager又放假未返. 平時嘅我就應該心急如焚, 但我最近卻非常平靜, 真係無乜擔心. 因為我有信心神會替我哋安排吖嘛. 我唯一擔心嘅, 就係我再係咁等落去, 我會買唔到飛機票, 要買貴價飛.

清場

2007-10-21T22:53:00.001-07:00

終於都搬走晒D嘢喇, 安樂晒! 兩個人住700呎地方, 居然都要差不多7小時才可完成所有包裝及搬走共46件大大小小物件.

我哋帶唔到張餐枱同個鞋櫃走, 其實佢哋都仲好新淨, 好唔想就咁俾下一手業主丟棄. 真係好, 俾我在網上搵到個街坊對呢D傢俬有需要. 佢肯用好過丟棄這些傢俬到堆填區, 我非常樂意送晒俾佢. 街坊昨晚已經上嚟搬走張餐枱, 個鞋櫃太重, 佢要過兩日搵多個人幫手上嚟搬. 宜家覺得自己間屋好似好大好空曠, 講嘢都好似有回音, 勁.

我諗我有咗

2007-10-17T22:51:00.000-07:00

我諗我真係有咗, 我已經連續幾日經常作嘔, 真係成日都好似有D嘢頂住個喉嚨, 成日都想嘔. 呢幾日食嘢都冇咗享受嘅感覺, 個感覺似捱D食物多過去享受D食物. 昨天我冇胃口到冇食lunch, 呢個情況仲罕有過白老虎生雙胞胎. 呢幾日都真係身心俱疲, 但係夜晚我真係瞓唔著. 個人真係好疲倦, 但係瞓唔到, 個腦太多嘢要諗, 太多嘢要擔心.

其實係因為星期六搬運公司就嚟, 宜家屋企係前所未有咁混亂, 真係好似永遠都沒法執得完咁, 我真係每日返屋企一入門口就頭暈. 仲有就係星期二朝俾上次個manager Gloria同埋一個叫Jason嘅manager interview我. 個個人都話如果Gloria又嚟interview我, 即係Gloria係ok我嘅, 應該冇問題. 星期一晚interview前已經瞓得唔好, 星期二晚interview後俾人咁講更加瞓得唔好, 因為太興奮, 但係又好驚希望越大, 失望越大. 昨天早上Jason同我現任manager Kitty傾電話, 問關於我嘅嘢. Kitty真係冇得頂, push佢要我. Jason話佢已經send咗我嘅info俾佢老闆Binfield批准. 宜家真係全世界都話我得咗, 但係我真係好驚隻馬喺直路最尾臨衝線斷腳騎師墮馬. 一日我未收到通知, 我都唔敢話我已經成功.

昨晚本來9點幾就瞓, 但係瞓到10點幾老豆打電話嚟, 咁我就俾佢嘈醒咗, 跟住我又起身執吓嘢. 到12點幾再瞓落床, 但係到1點幾2點都瞓唔著, 突然又諗起今日要帶封信返公司send去人事部. 真係控制唔到自己個腦, 佢真係不停咁自己諗嘢.

唔知咁樣咁大壓力, 少休息, 又唔食嘢, 係咪可以減磅嘅呢? :P

準備工夫 (3)

2007-10-06T07:56:00.000-07:00

星期三搬運公司送咗D紙箱嚟屋企之後, 今日正式開始pack箱. 原來呢度真係好潮濕, 太太有幾個銀包發咗霉, 全部宣佈死亡. 我自己都丟咗好多垃圾, 都唔知點解當初會keep咁多無無謂謂嘅嘢喺屋企. 我又將十幾本舊書送咗俾幾個街坊. D書仲好新, 好過全部去晒垃圾桶.

宜家成間屋都有大大小小嘅雜物同紙箱, 好混亂, 好想搬運公司快D搬晒佢哋走.

準備工夫 (2)

2007-10-01T19:20:00.000-07:00

十幾廿年前, 差不多人人移民到會落雪的地方都會買件羽絨褸, 彷彿就是指定動作. 大約三星期後我們就會搬運傢俱/個人物件到海外, 我們都要作些準備. 我們當然沒有一人買一件新羽絨褸, 我們只是買了少少衣服鞋襪, 太太的護膚品, 和一個大一點嘅真空煲, 其實真的不算多. 相反, 在剛過去的國慶長假期, 我們在衣櫃裡找出很多唔啱著或者已經舊嘅衣服, 足足裝滿四個大膠袋, 全部已經捐晒去舊衣回收站.

星期六, 我們又取消了我們的銀行保險箱, 如果唔係要移民, 我估太太都會繼續保留個保險箱. 太太將一些結婚時親戚送嘅金飾賣俾周大福, 咁啱現在金價咁高, 睇住佢坐喺度收錢都覺得非常過癮. 其實那些結婚金器真係好娘, 又唔會戴出街, 唔賣就真係笨.

另外, 我又賣了屋企部抽濕機給一個街坊朋友, 幸好我們住在同一個屋苑, 他到我們家自取都好方便. 我們尚有一個小電飯煲, 電燒煱和一把風扇, 我希望遲點可以將這些小型電器捐去聖雅各福群會的電器回收重用計劃, 唔想浪費.

是禍是福

2007-09-27T02:37:00.000-07:00

昨日公眾假期, 但我比平日還要早起床, 因為我要打電話去加國俾人interview. 其實我都唔知算唔算係一個interview, 因為個manager喺email表示"Let's set up a time to chat". 無論係點, 我都要做足準備工夫, present好自己. 之前打電話俾在當地工作嘅朋友Vincent, 佢同個manager係同事, 睇吓可唔可以攞料, 但係搵咗幾次Vincent都係駁咗去留言信箱.

Interview末段, 個manager同我講我哋今次可能冇機會合作. 因為: 1)時間唔配合. 我11月中才到當地, 佢個project到11月19日已經係implementation階段. 2) 我唔識當地mutual fund嘅operations. 因為project已經到了implementation階段, 佢唔可以afford俾個新人入嚟慢慢學. 俾人咁樣reject感覺當然唔好, 個manager俾咗feedback我, 話我個background好, 有operations經驗, 識得同唔同department嘅人溝通做嘢, 有IT經驗等廢話, 仲叫我到達當地後聯絡佢, 睇吓有冇合作機會. 佢死梗架喇, 我到時一定會搵佢, 我面皮有需要嘅時候, 可以好厚架.

今日下午, Vincent突然打電話俾我, 原來佢返咗嚟香港放大假. 我冇同佢講我同佢同事講過電話, 只係問佢識唔識一個叫Gloria嘅manager. Vincent一聽到, 好大反應咁叫我千祈千祈唔好申請佢份工. 吓? 佢問我知唔知點解會有呢個post? 佢話因為Gloria原本個staff做得好辛苦, 頂唔順呢個出名demanding嘅manager, 呢個staff(亦係Vincent個飯友)話Gloria係個地獄使者, 最終佢要搵大老闆救命, 轉咗team所以Gloria要請人, 不過一路都請唔到. Vincent話當地大把人識mutual fund啦, 但係都請唔到人, 即係呢個人出咗名真係唔掂啦. 又好似有D道理咁喎, 咁究竟我係好彩定唔好彩呢?

7.82750

2007-09-21T09:58:00.000-07:00

呢個日子終於來臨, 加幣終於都好似火箭咁升穿7.8水平.

加幣升破一算, 1.00 USD = 0.997421 CAD, 真係嘔血.

十幾年前在加國居住, 加幣兌港元五個幾/六蚊都已經好貴, 宜家仲要當兌換美金咁.

我已經打算只會將自己極少身家兌換加幣, 我唔信自己真係咁黑仔, 我唔信加幣只會升唔識跌. 如果宜家兌換, 去到真係身家縮水一大截.

我未必愛國內同胞, 但我cheap, 我愛他們的錢. 我打算留我副身家喺度, 投入祖國懷抱, 與國內同胞喺股票市場一齊癲.

無聊

2007-09-17T22:22:00.000-07:00

呢幾日無聊到極, 返工冇嘢做. 一嚟唔會有新project assign俾我, 二嚟手上有D project上兩星期已經交功課, 三嚟個東京project D嘢pend住晒喺D日本同事度. 除咗喺公司留意下intranet睇下有冇opening, 日日都係返工等放工, 唯有日日搵D私人嘢做吓, 打發時間.

屋企有一套Onkyo家庭影院, 不是甚麼高檔貨, 只係幾千銀一套嘅貨色, 但我真係好鍾意佢. 可惜佢只可用220V電壓, 唔適合外國用. 如果我將佢放售, 根本冇價冇市. 我諗住買幾個變壓器將110V變220V俾佢用, 咁我就可以帶埋佢走. 昨日我去旺角D影音店問, 店員叫我不如在當地買過一套算數. 佢話一個可靠嘅變壓器可以賣一萬銀(仲貴過我套機), 平嗰D如果燒著連間屋都燒埋就死得. 雖然我覺得佢都唔係冇道理, 但係佢賣D貴價音響, 當然要用過萬銀嘅變壓器啦. 我條氣唔順, 打算搵日去鴨尞街再問吓, 因為我從來都冇諗過唔帶套機走.

今日我去咗銀行取消一張我已經幾年冇用過嘅信用卡及一個支票戶口. 其實走之前我仲要取消Citibank, Manhattan, 東亞同DBS信用卡各一張. 因為我太得閒嘅關係, 我打算慢慢分幾日一張一張咁取消, 如果唔係我真係會無聊死.

明日, 我打算打電話去搬運公司, 約佢哋上嚟屋企打價, 等我可以快些決定搵邊間做搬運. 唉, 幾件小事我咁都要分幾日做, 我嘅生活真係無聊到極, 我就嚟發霉喇.

再見 (1)

2007-09-12T18:55:00.000-07:00

昨晚與教會一班弟兄姊妹聚會. 我們都是在同一屆受浸, 本來每隔三四個月就會有聚會, 但係之前因各樣原因, 我已經幾次沒有出席.

同呢班弟兄姊妹相處真係幾舒服, 雖然我們年紀輩份由五六十歲退休級到二三十歲壯年級都有, 但係我哋都可以混埋一齊, 真係發覺唔到有乜代溝喎. 聚會時我們談談自己嘅近況, 原來筠屋企有財政困難, 佢可能要出嚟做嘢, 但係佢已經廿年無做嘢, 身體又唔好, 又擔心又驚. 喜因為舖頭生意唔好, 唔做生意轉行做到工廠做保安. 佢習慣早睡早起, 以前我哋晚上聚會, 到9時多佢就眼瞓. 現在他的上班時間係晚7朝7, 感謝主佢都能適應到. 空姐啊心亦都唔做空姐, 去某地方做宣道工作. 始終佢將會去比較保守嘅國家, 呢類嘢比較敏感, 對她來說有D困難有D危險, 我好擔心佢哋幾個. 當然, 我哋都有開心事件. Wing個多月前生了一個仔, Amy原來今年年尾結婚. 很替佢哋高興, 可惜我唔能夠參加Amy嘅婚禮.

輪到我, 我當然係告訴他們我將要離開香港. 他們都祝福我, 唔係一般普通人咁話你就好啦, 乜乜物物等廢話, 真係好感動. 我到聚會之前, 都從無諗過離開會唔捨得任何親戚朋友. 我時常都覺得, 個地球其實好細, 坐飛機又方便又容易, 要見面有幾難? 但係昨晚聚會結束時, 我真係好唔捨得佢哋. 我真係估唔到我會有呢種感覺.

準備工夫 (1)

2007-09-08T19:33:00.000-07:00

一路都諗緊一些財務安排, 我應該點帶我D錢走呢? 我又應該留幾多錢喺香港買股票餵大鱷呢? 因為工作關係, 得知公司可以替客人在海外開銀行戶口. 咁我星期五就蛇王早D走, 去銀行開海外戶口. 原來宜家D環球性嘅銀行咁好嘢, 一個客人可以在海外開戶, 用internet已經可以自由搬動資金, 係自己名下嘅戶口轉賬又不用收手續費, 真係無得頂. 咁我就唔需要咁老土, 臨走前買張本票, 將自己成副身家寫喺呢張紙度, 仲要小心驚唔見咗張本票冇錢用啦. 宜家佢替我申請開戶之餘, 仲申請一張提款卡和一張當地貨幣嘅信用卡, 真係方便到極. 咁我又唔駛在當地用香港嘅信用卡蝕手續費同匯率俾信用卡公司喇. 銀行職員仲講咗一個非常重要嘅開戶好處, 就係可以將我喺香港咁多年嘅信貸記錄和credit line帶過去當地, 咁我就不用在當地從新再建立, 將來如果有本事買屋, 申請mortgage都冇咁辛苦.

開完銀行戶口之後, 我就上律師樓簽間屋嘅買賣合約同收大訂, 之前嘅無聊幻想買家撻訂結束, 個買家係認真要買呢間屋, 我真係將會搬離呢個地方喇. 有冇唔捨得呢間屋呢? 都有少少啦. 始終呢間都係我第一間屋, 呢度環境都幾好: 夠清靜. 從窗外望出去有山又有海真係好舒服. 不過香港好多時都好大煙霞, 真係破壞晒咁好嘅景觀.

間屋裡面, 我哋都keep得好好架, 我哋大部份時間都keep得間屋好整齊, 之前上嚟睇樓嘅客同經紀, 都讚我哋間屋keep得好, 仲問我哋係咪成日唔喺度所以間屋D地板, 廚房浴室等等個狀況咁好. 哼! 睇小我. 除咗去旅行, 我一年三百幾廿日都係度啊! 其實以前睇樓都見過人哋間屋亂到好似狗竇咁, 都唔開胃即刻要走啦, 所以賣樓前用少少時間執整齊間屋留個好印象, 唔係難吖.

攪掂

2007-08-25T18:57:00.000-07:00

星期四晚九點半有個經紀帶個師奶嚟睇樓, 其實佢只係幫個朋友睇, 如果基本要求啱嘅話, 佢個所謂「好忙」嘅朋友就會星期六上嚟睇. 經紀同我講, 話個買家本身在大陸做嘢, 宜家有D錢, 加上佢自己現在在同屋苑嘅一房單位唔夠住, 所以想搵我呢類景觀嘅兩房單位. 聽得出個經紀好心急又好緊張佢呢個客, 我呢D牛精王真係得鬼閒睬你, 我最憎呢D經紀見人有錢就脷都伸晒出嚟, 見我呢D死窮鬼客就要我就佢個客嘅時間. 大家約好, 星期六中午要等我太太瞓醒先俾個客上嚟睇. 當晚佢哋走後我都冇乜感覺. 之前D客上嚟睇完, 我都好期待住個經紀call番我還價. 但係呢個case, 我唔係好想同佢做, 因為當晚個師奶冇乜禮貌, 人哋屋主開門, 入人哋間屋打個招呼呢D基本禮貌佢都冇, 乞我憎. 仲有就係佢喺我間屋打電話俾個朋友時, 佢講得好大聲好嘈, 呢個亦係我其中一個最唔鍾意呢個城市, 想走去做新移民嘅原因. 最後, 係因為感覺上呢個屋苑嘅住客係比較年輕嘅, 我一心都係諗住賣間屋俾對young couple, 從來冇諗過賣俾師奶.

星期五同平時一樣, 我祈求天父可以幫助我順利賣出間屋, 我亦諗住股市好番D會有多D人約時間weekend嚟睇樓, 點知一個電話都冇. 其實我開始有少少擔心, 因為我10月尾就會離職. 如果我到時都仲未賣到間屋, 咁我就唔可以再享用職員按揭利率, 要轉做高D嘅街客利率, 仲要有一年罰息期, double傷. 仲有一個星期就九月, 樓宇成交平均都要個多月, 所以我「剩餘」嘅時間其實唔係好多. 我又唔可以同經紀講叫佢谷我個盤, 到時實俾佢壓價.

星期六中午, 經紀帶兩個師奶上嚟, 佢哋都算睇得快, 10分鐘唔夠就走, 佢哋跟住落咗樓下大堂傾. 經紀同我前後講多一兩個電話, 我便同太太外出午膳. 我哋落到樓下大堂, 原來佢哋仲未走, 經紀仲喺度call緊我哋. 原來Supply同Demand兩條線已經成功交叉重疊, 買家馬上搵人從炮台山攞支票過嚟. 經紀叫我哋等佢半個鐘. 唔得! 我哋要去食晏, 我到那一刻都仲未有甚麼感覺, 只係唔想顯得我好desperate.

食完晏, 落去經紀行收票簽臨時約, 交易初步完成. 其實呢個真正嘅客人都幾好, 好多嘢都冇乜所謂. 我提出10月最尾一個星期交樓(遷就我自己職員按揭嘅時間), 佢好爽快應承. 佢唔要我D傢俬, 經紀要求我哋搬走, 我太太好嘢, 企硬話唔搬, 個客都冇乜所謂, 最後個經紀自己搵人幫佢搬. 有時都要讚吓我太太, 又唔傻得晒. 我發覺我似我老豆, 衰嘢就推個老婆出去做. :P

真係好感恩, 天父嘅安排真係完美到不得了. 之前都有個客還價, 個經紀都前後同我哋兩邊講咗個多星期, 但係都係價錢相差幾萬傾唔成. 但係今次, 當我真係冇諗過呢個係「真命天子」嘅時候, 天父就安排呢個有「實力」, 時間又有彈性嘅買家, 都冇乜麻麻煩煩討價還價, 就讓我可以順利賣出間屋喇. 試問仲有邊個可以做到咁完美吖 :)

從失敗中學習?

2007-08-19T18:32:00.000-07:00

星期六收到一個manager嘅email, 佢好有禮貌咁reject咗我份job application. 好奇怪, 我都唔知佢係邊個, 佢在email中提及嘅post我見都未見過, 可能係我香港嘅manager或人事部幫我申請嘅. 無論如何, 再一次提醒我, 在外地搵工作, 真係唔係咁容易.

我每日向神禱告, 神俾我嘅回應真係十分奇妙. 當初我話要去做新移民, 我最擔心係搵工. 每日禱告, 出現咗唔同嘅人話嘗試幫我搵工或者介紹, 好似每份工作會自動埋嚟搵我咁. 以為掂晒唔駛咁擔心嘅時候, 我就減少有關搵工作嘅禱告, 就係咁就收到俾人reject嘅通知喇. 好一個提醒, 提醒我要凡事倚靠神,不可輕忽、不可過份自信、不可自作主張. 另一方面見間屋放咗盤兩星期都無人問津, 就擔心間屋賣唔出, 咁我就好自然將禱告嘅重點變成間屋可以順利出售. 神真係聽禱告嘅, 過去兩個週末, 都有唔少人嚟睇樓, 有三個真係有興趣嘅買家, 仲已經或者準備還價添. 雖然買家出嘅價與我哋嘅心水價尚有距離, 但係距離已經愈來愈接近, 相信成交只係時間嘅問題. 有咗搵工嘅教訓, 我現在會繼續凡事倚靠神, 不倚靠自己, 仲有最緊要就係凡事謝恩.

Not NOW

2007-08-05T22:35:00.000-07:00

離開原居地到一個新地方成為新移民, 就一定要放棄或者犧牲一些喺原居地嘅嘢. 日子越來越近, 才知道要成為新移民嘅犧牲, 原來係咁痛苦嘅.

自從有線冇咗EPL轉播權, 大家都等緊NOW幾時出一些平價plans. 等到現在開季前一星期, 佢都要客戶簽約至少18個月. 要我同佢簽約18個月, 根本無可能. 即使佢轉死性肯同我簽兩三個月約, 如果我好彩好快賣出間屋要搬走, 個NOW都唔知點算. 唯有放棄, 開季後用另類方法睇EPL啦.

昨晚舉行Community Shield, 不論MU或Chelsea, 我都唔鍾意. 不過從書房望出街外, 見到附近幾個街坊部電視都係播緊場足球比賽. 餓咗波3個月, 我真係好想睇! 可惜我冇NOW! 嘗試用另類方法睇, 點知個connection慢到死, 即使connect得到都係咁窒油. 唉, 下星期正式開季都唔知點算. 睇嚟要開始習慣以後冇英國波睇的日子喇.

面對現實

2007-07-26T01:02:00.000-07:00

前兩日扮途經中原, 問吓個經紀我個單位值幾多. 傾傾吓, 佢話不如幫我睇吓我附近嘅單位嗌價嗌幾多啦. 又好, 跟佢入去舖內睇睇電腦記錄. 今次大鑊, 原來exactly我樓上同樓下都放緊盤仲叫緊同一個價錢, 而我喺利記地產叫緊個價仲比佢哋高. 除非我個單位有金啦, 如果唔係肯俾高D價錢買我個單位嘅人一定係傻嘅.

今日唯有打俾利記地產個經紀認衰. 始終要面對現實改低個價, 仲叫佢幫我放埋其他幾間代理. 之前嘅心理戰我輸晒, 唔夠佢玩, 真無癮.

搵工

2007-07-18T19:23:00.000-07:00

我最擔心做新移民後嘅就業問題, 每天我都把自己與太太將來嘅就業問題放入禱告當中. 非常感恩, 現在有4位同事分別幫我鋪橋搭路, 與他們在當地分公司內嘅朋友聯絡, 睇吓有冇工作機會. 我明白唔一定可以就這樣輕易找到工作, 但總好過去到先開始自己搵. 太太都有個朋友認識當地一個集團嘅人事部要員, 剛巧這位人兄是我爸的舊同事, 希望都有個機會啦.

唉, 由小到大我都唔係一個所謂好運嘅人. 現在這個搵工情況, 真係比我想像中順利. 但係係咪真係1+1=2咁簡單呢? 其實睇落越順利, 我就越擔心. 你估真係咁容易咩.

放盤

2007-07-12T22:53:00.000-07:00

今日打咗電話俾當年我買樓嘅經紀, 佢已經升咗職調去另一區做, 但係我都想搵返佢放盤. 喺屋企附近時常見到D地產經紀列隊搵客. 唉, 個個蛇頭鼠眼真係見到都唔開胃. 就算我想買或賣樓, 見到佢哋個個嘅前額都好似寫住個賊字咁, 冇一個嘅樣係老實嘅, 點搵得佢哋幫手?

即使係對住呢個舊經紀, 始終都係同佢有利益衝突, 所以同佢講嘢我都特別小心. 我真係唔急架, 我唔會平賣架, 咪駛旨意同我整個移民急讓啊, 亦唔駛幫我喺XX, YY, 同ZZ你D行家度放埋喇. 大家大玩心理戰, 真係麻鬼煩, 真係辛苦. 鬼叫我窮, 睇在D錢份上, 麻煩辛苦D都要做一次, 遲D如果有客壓我價, 同佢negotiate時可能仲麻煩仲辛苦.

職位空缺

2007-07-11T00:57:00.000-07:00

喺公司intranet見到新地方有個職位空缺. 這個職位同我現在嘅工作, 無論係部門, 職位同職責, 都係一模一樣. 我真係嚇一跳. 有乜理由咁荀? 我有個預感, 我一定唔會得到呢份工. 無理由所有事都咁順利, 嚟得咁自然.

我口講我唔會得到呢份工, 但我當然唔會放棄呢個機會. 我已經update好我份CV, 我send咗封email俾佢哋個Senior HR Manager, 話佢知我會做個新移民, 請教佢我可以點申請份工. 希望明早返工會收到佢嘅回覆啦.

遞信

2007-07-10T03:28:00.000-07:00

今日行咗我要成為新移民嘅第一步: 辭職.

我尚未在新地方找到工作的, 遞信之後突然發覺好無安全感. 其實我已經諗清諗楚, 亦準備好做新移民可能要食老本一段時間, 但係行動之後, 先至識得驚.

我梗係冇咁傻仔啦, 其實情況並唔係咁差, 只不過我唔想太樂觀, 出咗事時太失望啫. 非常感恩, 俾我跟著個來自澳洲嘅manager, 清楚知道呢間公司international transfer嘅policy. 佢主動幫我安排一切, 攪到我都非常唔好意思, 咁大個人都好似啊媽幫個仔攪去外國讀書咁. 我都確實欠佢一個大人情.